tu payambar sahi ye moajiza kafi to nahin

tū payambar sahī ye mo.ajiza kaafī to nahīñ

shā.irī ziist ke zaḳhmoñ kī talāfī to nahīñ

sāya-e-gul meñ zarā der jo sustā.e haiñ

sāya-e-dār se ye va.ada-ḳhilāfī to nahīñ

apnī duniyā se milī fursat-e-yak-jast hameñ

āsmāñ ke liye ik jast hī kaafī to nahīñ

kisī chaḌhte hue sūraj kī parastish na karo

dekh lo is meñ koī sho.abada-bāfī to nahīñ

tishnagī ham ko milī tum hue sairāb to kyā

in muqaddar kī sazāoñ se muāfī to nahīñ

dev-mālā kā dhuñdlakā ho ki ḳhvāboñ kī kiran

aaj kī ā.īna-sāzī kī munāfī to nahīñ

ḳhvāb Takrāo haqīqat se ki sho.ale nikleñ

is añdhere meñ diyā ek hī kaafī to nahīñ

tu payambar sahi ye moajiza kafi to nahin

shairi zist ke zaKHmon ki talafi to nahin

saya-e-gul mein zara der jo sustae hain

saya-e-dar se ye wada-KHilafi to nahin

apni duniya se mili fursat-e-yak-jast hamein

aasman ke liye ek jast hi kafi to nahin

kisi chaDhte hue suraj ki parastish na karo

dekh lo is mein koi shoabada-bafi to nahin

tishnagi hum ko mili tum hue sairab to kya

in muqaddar ki sazaon se muafi to nahin

dew-mala ka dhundlaka ho ki KHwabon ki kiran

aaj ki aaina-sazi ki munafi to nahin

KHwab Takrao haqiqat se ki shoale niklen

is andhere mein diya ek hi kafi to nahin