تو پژمردہ پیڑوں کو یوں با ثمر رکھ

تو پژمردہ پیڑوں کو یوں با ثمر رکھ

توانائی دے شاخ کو با اثر رکھ

نہ کر فخر اجداد کے تو شجر پر

تو شاخوں پہ خود کاوشوں کا ثمر رکھ

ہے انکار کرنا بہت سہل و آساں

تو اقرار کا حوصلہ اے بشر رکھ

زمینی حقائق رہیں تیرے آگے

نظر اپنی چاہے سدا چرخ پر رکھ

نہ ہو جائے مانند آتش سراپا

مرے دل کی اے جان جاناں خبر رکھ

کر احقاق حق اور ابطال باطل

یہ جذبہ ہر اک موڑ پر بے خطر رکھ

سبھی کی محبت سما جائے دل میں

تو اس میں ہمیشہ محبت کا گھر رکھ

گہر خود ہی آ جائے گا پاس عینیؔ

نہایت پہ منزل کی گہری نظر رکھ