tu sab kuchh jaanne wala akela

tū sab kuchh jānñe vaalā akelā

batā phir kyoñ huuñ maiñ itnā akelā

terī chāhat meñ tere ġham bhī chāhe

kabhī tujh ko nahīñ chāhā akelā

maiñ mahfil meñ hañsāne vaalā sab ko

pas-e-parda bahut royā akelā

badan huuñ maiñ agar to vo bhī hogā

kabhī hotā nahīñ saayā akelā

haTā dī yaar kī tasvīr maiñ ne

taḌap kar ro paḌā kamrā akelā

vo apne saath mujh ko le gayā hai

maiñ jis ko chhoḌ kar lauTā akelā

tamāsha ban ga.ī hai saarī duniyā

bachā maiñ dekhne vaalā akelā

tu sab kuchh jaanne wala akela

bata phir kyon hun main itna akela

teri chahat mein tere gham bhi chahe

kabhi tujh ko nahin chaha akela

main mahfil mein hansane wala sab ko

pas-e-parda bahut roya akela

badan hun main agar to wo bhi hoga

kabhi hota nahin saya akela

haTa di yar ki taswir main ne

taDap kar ro paDa kamra akela

wo apne sath mujh ko le gaya hai

main jis ko chhoD kar lauTa akela

tamasha ban gai hai sari duniya

bacha main dekhne wala akela