tufan hai maujzan meri chashm-e-pur-ab mein

tūfāñ hai maujzan mirī chashm-e-pur-āb meñ

Duubā tilism-e-'ishq se dariyā habāb meñ

jalve tumhāre nichle na baiThe naqāb meñ

in bijliyoñ ne aag lagā dī sahāb meñ

hoñToñ se tere jī ke rahā iztirāb meñ

machhlī kī jaan aa ga.ī murġh-e-kabāb meñ

maiñ ne kiyā salām lagā.e unhoñ ne tiir

chaar uñgliyāñ uThā.ī haiñ goyā javāb meñ

aa.ī hai baḌh ke rū-e-kitābī pe zulf-e-yār

bismillah aaj likkhī ga.ī hai kitāb meñ

chuTkī baġhal meñ le ke vo betāb kar ga.e

rāhat 'azāb meñ hai sukūñ iztirāb meñ

mahshar ke fitna fitne ke mahshar hai ham-ināñ

chalte haiñ donoñ mil ke tumhārī rikāb meñ

paanī meñ aur bū-e-vafā aisī tez tez

bulbul kī ruuh aa.ī hai khiñch kar gulāb meñ

ik ik ghaḌī hai roz-e-qayāmat firāq kī

sadiyoñ se jī rahā huuñ jahān-e-ḳharāb meñ

paḌh lī namāz-e-shukr mirī nā'sh dekh kar

'rāsiḳh' vo muft ho ga.e shāmil savāb meñ

tufan hai maujzan meri chashm-e-pur-ab mein

Duba tilism-e-'ishq se dariya habab mein

jalwe tumhaare nichle na baiThe naqab mein

in bijliyon ne aag laga di sahab mein

honTon se tere ji ke raha iztirab mein

machhli ki jaan aa gai murgh-e-kabab mein

main ne kiya salam lagae unhon ne tir

chaar ungliyan uThai hain goya jawab mein

aai hai baDh ke ru-e-kitabi pe zulf-e-yar

bismillah aaj likkhi gai hai kitab mein

chuTki baghal mein le ke wo betab kar gae

rahat 'azab mein hai sukun iztirab mein

mahshar ke fitna fitne ke mahshar hai ham-inan

chalte hain donon mil ke tumhaari rikab mein

pani mein aur bu-e-wafa aisi tez tez

bulbul ki ruh aai hai khinch kar gulab mein

ek ek ghaDi hai roz-e-qayamat firaq ki

sadiyon se ji raha hun jahan-e-KHarab mein

paDh li namaz-e-shukr meri na'sh dekh kar

'rasiKH' wo muft ho gae shamil sawab mein