tufan hi nahin ghat mein hon jis ke bhanwar bhi

tūfāñ hī nahīñ ghaat meñ hoñ jis ke bhañvar bhī

milte haiñ usī gahre samundar se guhar bhī

sahtā hai jo ik habs-e-musalsal kī girānī

hotā hai usī shahr se āñdhī kā guzar bhī

yuuñ pyaar hai us se ki faqat maiñ hī nahīñ huuñ

miTTī se bane haiñ mire dīvār bhī dar bhī

gur diip jilā kar use āgāh na kartā

mahfūz thā har shab kī havā se mirā ghar bhī

āñkhoñ se magar raat kā patthar nahīñ haTtā

ta.abīr to rakhtā hai mirā ḳhvāb-e-sahar bhī

julte haiñ kaḌī dhuup meñ kyuuñ apne hī āñgan

sūraj to yahī hai jo ubhartā hai udhar bhī

nisbat hai hameñ aise qabīle se ki jis ke

nezoñ pe sadā dete haiñ be jism ke sar bhī

kuchh soch ke vo bāb-e-qafas khol rahā hai

kal tak thī girāñ jis pe mirī jumbish-e-par bhī

ham log faqat dasht-navardī nahīñ karte

aatā hai hameñ shahr basāne kā hunar bhī

tufan hi nahin ghat mein hon jis ke bhanwar bhi

milte hain usi gahre samundar se guhar bhi

sahta hai jo ek habs-e-musalsal ki girani

hota hai usi shahr se aandhi ka guzar bhi

yun pyar hai us se ki faqat main hi nahin hun

miTTi se bane hain mere diwar bhi dar bhi

gur dip jila kar use aagah na karta

mahfuz tha har shab ki hawa se mera ghar bhi

aankhon se magar raat ka patthar nahin haTta

tabir to rakhta hai mera KHwab-e-sahar bhi

julte hain kaDi dhup mein kyun apne hi aangan

suraj to yahi hai jo ubharta hai udhar bhi

nisbat hai hamein aise qabile se ki jis ke

nezon pe sada dete hain be jism ke sar bhi

kuchh soch ke wo bab-e-qafas khol raha hai

kal tak thi giran jis pe meri jumbish-e-par bhi

hum log faqat dasht-nawardi nahin karte

aata hai hamein shahr basane ka hunar bhi