tufan ka hawaon ka pani ka kya bana

tūfān kā havāoñ kā paanī kā kyā banā

kashtī bhañvar meñ thī to ravānī kā kyā banā

kirdār to shurūa meñ maarā gayā magar

ye to batā ke jaao kahānī kā kyā banā

us ne ḳhabar ye dī mirā āñgan ujaḌ gayā

maiñ sochtī huuñ raat kī raanī kā kyā banā

ab peḌ to nahīñ haiñ parinde kahāñ ga.e

aur ye ki un kī naql-e-makānī kā kyā banā

vo le gayā thā saath kināre sameT kar

dariyā se pūchhtī rahī paanī kā kyā banā

maiñ aa.ine meñ DhūñDhtī rahtī huuñ raat din

kuchh to patā chale ki javānī kā kyā banā

maiñ to rukī nahīñ thī chalī aa.ī chhoḌ kar

jaane phir us kī talḳh-bayānī kā kyā banā

vo jo tumhāre paas amānat paḌī rahī

us gungunātī shaam suhānī kā kyā banā

tufan ka hawaon ka pani ka kya bana

kashti bhanwar mein thi to rawani ka kya bana

kirdar to shurua mein mara gaya magar

ye to bata ke jao kahani ka kya bana

us ne KHabar ye di mera aangan ujaD gaya

main sochti hun raat ki rani ka kya bana

ab peD to nahin hain parinde kahan gae

aur ye ki un ki naql-e-makani ka kya bana

wo le gaya tha sath kinare sameT kar

dariya se puchhti rahi pani ka kya bana

main aaine mein DhunDhti rahti hun raat din

kuchh to pata chale ki jawani ka kya bana

main to ruki nahin thi chali aai chhoD kar

jaane phir us ki talKH-bayani ka kya bana

wo jo tumhaare pas amanat paDi rahi

us gungunati sham suhani ka kya bana