tur par kya munhasir hai jis taraf jata hun main

tuur par kyā munhasir hai jis taraf jaatā huuñ maiñ

tere jalve kī jhalak har chiiz meñ paatā huuñ maiñ

ālam-e-ġhurbat meñ tanhā.ī se ghabrātā huuñ maiñ

yād-e-ahbāb-e-vatan se dil ko bahlātā huuñ maiñ

haa.e mastī meñ nahīñ rahtā zabāñ par iḳhtiyār

bātoñ bātoñ meñ na kahne kī bhī kah jaatā huuñ maiñ

ai adam ke jaane vaalo koī dam kī der hai

musta.id huuñ maiñ bhī aane ke liye aatā huuñ maiñ

manzil-e-maqsūd tak pahuñchūñ yahī dhun hai mujhe

dam nahīñ letā kahīñ baḌhtā chalā jaatā huuñ maiñ

muḳhtasar rūdād hai ye be-qarārī kī mirī

ḳhud taḌap kar dekhne vāloñ ko taḌpātā huuñ maiñ

kyā kisī kā husn hai ġhārat-gar-e-tāb-o-tavāñ

dekhte hī ik jhalak behosh ho jaatā huuñ maiñ

merī hastī un kī mahfil meñ garāñ-ḳhātir nahīñ

sūrat-e-bād-e-sabā jaatā huuñ maiñ aatā huuñ maiñ

de rahe haiñ kyā mujhe jiine ke ta.ane baar baar

nā-munāsib hai mirā jiinā to mar jaatā huuñ maiñ

ahl-e-mahfil ko sunātā huuñ mazāmīn-e-bahār

tab-e-rañgīñ ke zarīye phuul barsātā huuñ maiñ

garche qatra thā magar dariyā meñ milne ke sivā

mauj ban kar sat.h par dariyā kī lahrātā huuñ maiñ

bār-e-ḳhātir hai agar mahfil meñ merā baiThnā

kaisī mahfil lo zamāne se uThā jaatā huuñ maiñ

dar-haqīqat mere haq meñ maut kā paiġhām thā

un kā ye kahnā ḳhudā-hāfiz tirā jaatā huuñ maiñ

nāḳhun-e-tadbīr se taqdīr kā letā huuñ kaam

apnī har uljhī huī gutthī ko suljhātā huuñ maiñ

merī istid.ā pe mujh ko Tālne ke vāste

kah diyā zālim ne achchhā tum chalo aatā huuñ maiñ

qaum par ho kar tasadduq qaum par ho kar nisār

ġhāziyān-e-qaum kī tārīḳh dohrātā huuñ maiñ

kyuuñ na ho 'sābir' mire sher-o-suḳhan meñ puḳhtagī

mo'taqid jab hazrat-e-'nāsiḳh' kā kahlātā huuñ maiñ

tur par kya munhasir hai jis taraf jata hun main

tere jalwe ki jhalak har chiz mein pata hun main

aalam-e-ghurbat mein tanhai se ghabraata hun main

yaad-e-ahbab-e-watan se dil ko bahlata hun main

hae masti mein nahin rahta zaban par iKHtiyar

baaton baaton mein na kahne ki bhi kah jata hun main

ai adam ke jaane walo koi dam ki der hai

mustaid hun main bhi aane ke liye aata hun main

manzil-e-maqsud tak pahunchun yahi dhun hai mujhe

dam nahin leta kahin baDhta chala jata hun main

muKHtasar rudad hai ye be-qarari ki meri

KHud taDap kar dekhne walon ko taDpata hun main

kya kisi ka husn hai ghaarat-gar-e-tab-o-tawan

dekhte hi ek jhalak behosh ho jata hun main

meri hasti un ki mahfil mein garan-KHatir nahin

surat-e-baad-e-saba jata hun main aata hun main

de rahe hain kya mujhe jine ke tane bar bar

na-munasib hai mera jina to mar jata hun main

ahl-e-mahfil ko sunata hun mazamin-e-bahaar

tab-e-rangin ke zariye phul barsata hun main

garche qatra tha magar dariya mein milne ke siwa

mauj ban kar sath par dariya ki lahraata hun main

bar-e-KHatir hai agar mahfil mein mera baiThna

kaisi mahfil lo zamane se uTha jata hun main

dar-haqiqat mere haq mein maut ka paigham tha

un ka ye kahna KHuda-hafiz tera jata hun main

naKHun-e-tadbir se taqdir ka leta hun kaam

apni har uljhi hui gutthi ko suljhata hun main

meri istida pe mujh ko Talne ke waste

kah diya zalim ne achchha tum chalo aata hun main

qaum par ho kar tasadduq qaum par ho kar nisar

ghaziyan-e-qaum ki tariKH dohraata hun main

kyun na ho 'sabir' mere sher-o-suKHan mein puKHtagi

mo'taqid jab hazrat-e-'nasiKH' ka kahlata hun main