tur tha kaba tha dil tha jalwa-zar-e-yar tha

tuur thā ka.aba thā dil thā jalva-zār-e-yār thā

ishq sab kuchh thā magar phir ālam-e-asrār thā

nashsha-e-sad-jām kaif-e-intizār-e-yār thā

hijr meñ Thahrā huā dil sāġhar-e-sarshār thā

alvidā.a ai bazm-e-anjum hijr kī shab al-firāq

tā-ba-daur-e-zindagānī intizār-e-yār thā

ek adā se be-niyāz-e-qurb-o-dūrī kar diyā

māvrā-e-vasl-o-hijrāñ husn kā iqrār thā

jauhar-e-ā.īna-e-ālam bane aañsū mire

yuuñ to sach ye hai ki ronā ishq meñ bekār thā

shoḳhī-e-raftār vaj.h-e-hastī-e-barbād thī

zindagī kyā thī ġhubār-e-rahguzār-e-yār thā

ulfat-e-derīna kā jab zikr ishāroñ meñ kiyā

muskurā kar mujh se pūchhā tum ko kis se pyaar thā

dil-dukhe ro.e haiñ shāyad is jagah ai kū-e-dost

ḳhaak kā itnā chamak jaanā zarā dushvār thā

zarra zarra aa.ina thā ḳhud-numā.ī kā 'firāq'

sar-ba-sar sahrā-e-ālam jalva-zār-e-yār thā

tur tha kaba tha dil tha jalwa-zar-e-yar tha

ishq sab kuchh tha magar phir aalam-e-asrar tha

nashsha-e-sad-jam kaif-e-intizar-e-yar tha

hijr mein Thahra hua dil saghar-e-sarshaar tha

alwidaa ai bazm-e-anjum hijr ki shab al-firaq

ta-ba-daur-e-zindagani intizar-e-yar tha

ek ada se be-niyaz-e-qurb-o-duri kar diya

mawra-e-wasl-o-hijran husn ka iqrar tha

jauhar-e-aina-e-alam bane aansu mere

yun to sach ye hai ki rona ishq mein bekar tha

shoKHi-e-raftar wajh-e-hasti-e-barbaad thi

zindagi kya thi ghubar-e-rahguzar-e-yar tha

ulfat-e-derina ka jab zikr ishaaron mein kiya

muskura kar mujh se puchha tum ko kis se pyar tha

dil-dukhe roe hain shayad is jagah ai ku-e-dost

KHak ka itna chamak jaana zara dushwar tha

zarra zarra aaina tha KHud-numai ka 'firaq'

sar-ba-sar sahra-e-alam jalwa-zar-e-yar tha