TuT jaane ka bhi imkan tha tum jaante the

TuuT jaane kā bhī imkān thā tum jānte the

dil meñ sab kāñch kā sāmān thā tum jānte the

rāhat-e-qurb-e-rifāqat ke sabab zinda haiñ

varna jiinā kahāñ āsān thā tum jānte the

lazzat-e-dard se sairāb mujhe is ne kiyā

mujh pe ik shaḳhs kā ehsān thā tum jānte the

koī āvāz bhī patthar nahīñ kartī thī mujhe

apne jañgal kā maiñ sultān thā tum jānte the

kitnā mushkil thā kisī but kī parastish karnā

maiñ to kāfir bhī musalmān thā tum jānte the

zindagī mere tasarruf meñ thī vo kyā kartā

merī buniyād meñ tūfān thā tum jānte the

apne hāthoñ se likhūñ aur tumheñ roz paḌhūñ

dil meñ bas ek hī armān thā tum jānte the

ham-safar us ke the aur raḳht-e-safar bhī us kā

maiñ to bas be-sar-o-sāmān thā tum jānte the

ab use dard kī dahlīz pe chhoḌ aa.e ho

vo to haarā huā insān thā tum jānte the

jis kī ḳhushbū se mo.attar mere ash.ār the 'qais'

ek hī phuul mirī jaan thā tum jānte the

TuT jaane ka bhi imkan tha tum jaante the

dil mein sab kanch ka saman tha tum jaante the

rahat-e-qurb-e-rifaqat ke sabab zinda hain

warna jina kahan aasan tha tum jaante the

lazzat-e-dard se sairab mujhe is ne kiya

mujh pe ek shaKHs ka ehsan tha tum jaante the

koi aawaz bhi patthar nahin karti thi mujhe

apne jangal ka main sultan tha tum jaante the

kitna mushkil tha kisi but ki parastish karna

main to kafir bhi musalman tha tum jaante the

zindagi mere tasarruf mein thi wo kya karta

meri buniyaad mein tufan tha tum jaante the

apne hathon se likhun aur tumhein roz paDhun

dil mein bas ek hi arman tha tum jaante the

ham-safar us ke the aur raKHt-e-safar bhi us ka

main to bas be-sar-o-saman tha tum jaante the

ab use dard ki dahliz pe chhoD aae ho

wo to haara hua insan tha tum jaante the

jis ki KHushbu se moattar mere ashaar the 'qais'

ek hi phul meri jaan tha tum jaante the