TuT kar KHud bikhar gae hain aap

TuuT kar ḳhud bikhar ga.e haiñ aap

kis ke saa.e se Dar ga.e haiñ aap

mujh ko dikhlā rahe haiñ ā.īna

apnī had se guzar ga.e haiñ aap

ab jahāñ chāheñ jā.iye sāhab

mere dil se utar ga.e haiñ aap

dil ne kyā kyā na kuchh duā.eñ diiñ

mere ghar jab Thahar ga.e haiñ aap

maiñ ne jab bhī zabān kholī hai

dil churā kar mukar ga.e haiñ aap

kis taraf jā.ūñ maiñ kahāñ DhūñDūñ

kaun jaane kidhar ga.e haiñ aap

usī va.ade pe jī rahī hai 'sabā'

ek va.ada jo kar ga.e haiñ aap

TuT kar KHud bikhar gae hain aap

kis ke sae se Dar gae hain aap

mujh ko dikhla rahe hain aaina

apni had se guzar gae hain aap

ab jahan chahen jaiye sahab

mere dil se utar gae hain aap

dil ne kya kya na kuchh duaen din

mere ghar jab Thahar gae hain aap

main ne jab bhi zaban kholi hai

dil chura kar mukar gae hain aap

kis taraf jaun main kahan DhunDun

kaun jaane kidhar gae hain aap

usi wade pe ji rahi hai 'saba'

ek wada jo kar gae hain aap