ٹوٹا ہوا دیا ہی سہی زندگی تو ہے

ٹوٹا ہوا دیا ہی سہی زندگی تو ہے

سر پر ہمارے درد کی چادر تنی تو ہے

بھونچال آ رہا ہے دشاؤں میں ہر طرف

جنگل کی باس آج ہوا میں ملی تو ہے

تم پوجتے ہو جس کو خیالوں میں رات دن

لڑکی وہ سولہ سال کی چھت پر کھڑی تو ہے

موسم کے ساتھ آج بہکتی چلے ہوا

لغزیدہ کونپلوں میں ابھی تازگی تو ہے

پڑھیے عزیز جان کے میری نگارشات

کچھ ندرت خیال سہی شاعری تو ہے

خاطرؔ کسی غریب کو اتنا نہ چھیڑئیے

ٹوٹا ہوا ضرور سہی آدمی تو ہے