TuTe hain kaise KHwahishon ke aainon ko dekh

TuuTe haiñ kaise ḳhvāhishoñ ke ā.inoñ ko dekh

palkoñ kī tah meñ bikhrī huī kirchiyoñ ko dekh

maiñ huuñ tirā hī aks mire rañg par na jā

āñkhoñ meñ jhāñk apnī hī tanhā.iyoñ ko dekh

ye āsmāñ ke badle hue rañg ġhaur kar

in mausamoñ ke biphre hue tevaroñ ko dekh

sun to dar-e-ḳhayāl pe fardā kī dastakeñ

ḳhud kā hisār toḌ ke jaatī rutoñ ko dekh

galiyoñ meñ ghūmtī haiñ hazāroñ kahāniyāñ

chehroñ pe naqsh vaqt kī pahnā.iyoñ ko dekh

ik ik palak pe chhā.ī hai mahrūmiyoñ kī shaam

zabt-e-suḳhan kī aag meñ jalte laboñ ko dekh

kahtī hai 'shām' kuchh to makānoñ kī ḳhāmushī

be-mudda.ā nahīñ haiñ khule rauzanoñ ko dekh

TuTe hain kaise KHwahishon ke aainon ko dekh

palkon ki tah mein bikhri hui kirchiyon ko dekh

main hun tera hi aks mere rang par na ja

aankhon mein jhank apni hi tanhaiyon ko dekh

ye aasman ke badle hue rang ghaur kar

in mausamon ke biphre hue tewaron ko dekh

sun to dar-e-KHayal pe farda ki dastaken

KHud ka hisar toD ke jati ruton ko dekh

galiyon mein ghumti hain hazaron kahaniyan

chehron pe naqsh waqt ki pahnaiyon ko dekh

ek ek palak pe chhai hai mahrumiyon ki sham

zabt-e-suKHan ki aag mein jalte labon ko dekh

kahti hai 'sham' kuchh to makanon ki KHamushi

be-muddaa nahin hain khule rauzanon ko dekh