TuTe hue paron se parwaz kar rahe hain

TuuTe hue paroñ se parvāz kar rahe haiñ

ham phir na.e safar kā āġhāz kar rahe haiñ

sach bolne lage haiñ jab se zabāñ milī hai

har shaḳhs kā yahāñ ham e.azāz kar rahe haiñ

ā.īna paḌh liyā hai is baar ham sabhī ne

ḳhāmosh the jo kal tak āvāz kar rahe haiñ

bezār ho rahā hai jis dard se zamāna

us dard ko ham apnā dam-sāz kar rahe haiñ

muskān ke liye bhī majbūr ho ga.e ham

kis baat par na jaane phir naaz kar rahe haiñ

badnām kar diyā hai kuchh dostoñ ne jab se

ham dushmanoñ ko apnā hamrāz kar rahe haiñ

TuTe hue paron se parwaz kar rahe hain

hum phir nae safar ka aaghaz kar rahe hain

sach bolne lage hain jab se zaban mili hai

har shaKHs ka yahan hum eazaz kar rahe hain

aaina paDh liya hai is bar hum sabhi ne

KHamosh the jo kal tak aawaz kar rahe hain

bezar ho raha hai jis dard se zamana

us dard ko hum apna dam-saz kar rahe hain

muskan ke liye bhi majbur ho gae hum

kis baat par na jaane phir naz kar rahe hain

badnam kar diya hai kuchh doston ne jab se

hum dushmanon ko apna hamraaz kar rahe hain