TuTi hui diwar ki taqdir bana hun

TuuTī huī dīvār kī taqdīr banā huuñ

maiñ kaisā fasāna huuñ kahāñ likkhā huā huuñ

koī bhī mire karb se āgāh nahīñ hai

maiñ shāḳh se girte hue patte kī sadā huuñ

muTThī meñ liye maazī o imroz kī kirneñ

maiñ kab se na.e daur kī chaukhaT pe khaḌā huuñ

is shahr-e-pur-āshob ke hañgāma o shar meñ

zaitūn kī Daalī huuñ kahīñ shāḳh-e-hinā huuñ

gavayyā nahīñ lafzoñ ke ma.ānī se shanāsā

idrāk kī sarhad pe maiñ chup-chāp khaḌā huuñ

simTā to banā phūloñ kī ḳhush-rañg qabā.eñ

bikhrā huuñ to ḳhushbū kī tarah phail gayā huuñ

maiñ 'rāz' chamaktā huā jhūmar thā kisī kā

ab shab ke samundar meñ kahīñ Duub gayā huuñ

TuTi hui diwar ki taqdir bana hun

main kaisa fasana hun kahan likkha hua hun

koi bhi mere karb se aagah nahin hai

main shaKH se girte hue patte ki sada hun

muTThi mein liye mazi o imroz ki kirnen

main kab se nae daur ki chaukhaT pe khaDa hun

is shahr-e-pur-ashob ke hangama o shar mein

zaitun ki Dali hun kahin shaKH-e-hina hun

gawayya nahin lafzon ke maani se shanasa

idrak ki sarhad pe main chup-chap khaDa hun

simTa to bana phulon ki KHush-rang qabaen

bikhra hun to KHushbu ki tarah phail gaya hun

main 'raaz' chamakta hua jhumar tha kisi ka

ab shab ke samundar mein kahin Dub gaya hun