TuTi hui kashti pe bipharte hue girdab

TuuTī huī kashtī pe bipharte hue girdāb

allāh nigahbān tirā ai dil-e-betāb

jo mauj-e-havādis ke thapeḌoñ meñ palā ho

motī vahī hotā hai jahāñ meñ dur-e-nāyāb

phir aaj duāoñ meñ ghaTā maañg rahā hai

sūkhe hue tālāb meñ sahmā huā surḳhāb

ai zor-e-alī faqr-e-abūzar se baromand

be-zor tire sāmne har rustam-o-suhrāb

tiryāk ke kuuze meñ bharā zahr-e-halāhil

allāh-re mai-ḳhāna-e-maġhrib kī mai-e-nāb

dil toḌne vaale tujhe ma.alūm nahīñ hai

sūkhī huī āñkhoñ se ubal paḌte haiñ sailāb

naġhmāt se bezār muġhannī se gurezāñ

sāzoñ ko taras jaa.eñ na TuuTe hue mizrāb

tū apnī haqīqat kā shanāsā nahīñ varna

dariyā tire dāman meñ hai ai māhī-e-be-āb

'bazmī' ye jafāoñ kā sulagtā huā sahrā

allāh rakhe tujh ko zamāne meñ zafar-yāb

TuTi hui kashti pe bipharte hue girdab

allah nigahban tera ai dil-e-betab

jo mauj-e-hawadis ke thapeDon mein pala ho

moti wahi hota hai jahan mein dur-e-nayab

phir aaj duaon mein ghaTa mang raha hai

sukhe hue talab mein sahma hua surKHab

ai zor-e-ali faqr-e-abuzar se baromand

be-zor tere samne har rustam-o-suhrab

tiryak ke kuze mein bhara zahr-e-halahil

allah-re mai-KHana-e-maghrib ki mai-e-nab

dil toDne wale tujhe malum nahin hai

sukhi hui aankhon se ubal paDte hain sailab

naghmat se bezar mughanni se gurezan

sazon ko taras jaen na TuTe hue mizrab

tu apni haqiqat ka shanasa nahin warna

dariya tere daman mein hai ai mahi-e-be-ab

'bazmi' ye jafaon ka sulagta hua sahra

allah rakhe tujh ko zamane mein zafar-yab