tuyur-e-fikr-o-suKHan ki uDan zinda hai

tuyūr-e-fikr-o-suḳhan kī uḌaan zinda hai

ḳhudā kā shukr ki urdu zabān zinda hai

tanābeñ kaaT diiñ jis ne mirī zamīn ke saath

use kaho ki abhī āsmān zinda hai

ajab hai gumbad-e-be-dar kī guuñj sun lenā

samā.atoñ pe tirā ye gumān zinda hai

nagar kī puḳhta havelī meñ ghuT ke marne se

chalo ki gaañv kā kachchā makān zinda hai

paroñ ko baiTh gayā kyoñ sameT kar apne

uḌaan bhar ki abhī āsmān zinda hai

ḳhudā ke ghar ko girāyā to kyā kamāl kiyā

kamāl ye hai ki ab bhī azaan zinda hai

bahut hī ḳhush haiñ fasādī jalā ke ghar merā

ḳhabar nahīñ ki mirā ḳhāndān zinda hai

hamārā ḳhuun hai shāmil vatan kī miTTī meñ

hamāre dam se hī hindostān zinda hai

yazīdiyat to 'razā' hai fanā kī manzil meñ

husainiyat tirā nām-o-nishān zinda hai

tuyur-e-fikr-o-suKHan ki uDan zinda hai

KHuda ka shukr ki urdu zaban zinda hai

tanaben kaT din jis ne meri zamin ke sath

use kaho ki abhi aasman zinda hai

ajab hai gumbad-e-be-dar ki gunj sun lena

samaaton pe tera ye guman zinda hai

nagar ki puKHta haweli mein ghuT ke marne se

chalo ki ganw ka kachcha makan zinda hai

paron ko baiTh gaya kyon sameT kar apne

uDan bhar ki abhi aasman zinda hai

KHuda ke ghar ko giraya to kya kamal kiya

kamal ye hai ki ab bhi azan zinda hai

bahut hi KHush hain fasadi jala ke ghar mera

KHabar nahin ki mera KHandan zinda hai

hamara KHun hai shamil watan ki miTTi mein

hamare dam se hi hindostan zinda hai

yazidiyat to 'raza' hai fana ki manzil mein

husainiyat tera nam-o-nishan zinda hai