ubharta chand likkhenge sunahra KHwab likkhenge

ubhartā chāñd likkheñge sunahrā ḳhvāb likkheñge

kitāb-e-dil kā ik din phir se pahlā baab likkheñge

hayā aa.ī gar apnī bebasī kā zikr karne se

'alāmat kī zabāñ meñ māhī-e-be-āb likkheñge

ham apne zaaġh ko tā.ūs kahne par musir hoñge

to sab tālāb kī chiḌiyoñ ko bhī surḳhāb likkheñge

hamāre zehn zang-ālūd dast-o-pā haiñ nākāra

ham ab tārīḳh zer-e-mimbar-o-mehrāb likkheñge

kabhī tārīḳh meñ be-nām rahnā hī bhalā.ī hai

tumhārā zikr likkheñge to phir qassāb likkheñge

sutūn-e-jism par mere na.e zaḳhmoñ ke resham se

mohabbat kā tarāna ḳhud mire ahbāb likkheñge

ubharta chand likkhenge sunahra KHwab likkhenge

kitab-e-dil ka ek din phir se pahla bab likkhenge

haya aai gar apni bebasi ka zikr karne se

'alamat ki zaban mein mahi-e-be-ab likkhenge

hum apne zagh ko taus kahne par musir honge

to sab talab ki chiDiyon ko bhi surKHab likkhenge

hamare zehn zang-alud dast-o-pa hain nakara

hum ab tariKH zer-e-mimbar-o-mehrab likkhenge

kabhi tariKH mein be-nam rahna hi bhalai hai

tumhaara zikr likkhenge to phir qassab likkhenge

sutun-e-jism par mere nae zaKHmon ke resham se

mohabbat ka tarana KHud mere ahbab likkhenge