‘ubur kar wadi-e-tazabzub faraaz ki rahguzar se pahle

‘ubūr kar vādī-e-tazabzub farāz kī rahguzar se pahle

matā'-e-‘azm-o-yaqīñ hai vājib safar meñ raḳht-e-safar se pahle

ye māh-o-anjum sarā surayyā chaman bayābāñ ḳhizāñ bahārāñ

haiñ sab haqīqat meñ be-haqīqat haqīqat-e-muntazar se pahle

kahāñ the ye rāh-o-rasm-e-manzil kahāñ the dār-o-rasan salāsil

thā kaun maqtal meñ sar-kashīda tumhāre shorīda-sar se pahle

khanak rahī hai abhī to paa.el baras rahe haiñ abhī to bādal

ye kyā ki bahne lagā hai kājal hujūm-e-barq-o-sharar se pahle

milā jo mauqa' to ham-safīro maiñ apnī rūdād yuuñ kahūñgā

ki ro paḌegī fazā-e-mahmil huzūr meñ chashm-e-tar se pahle

hai ‘āriz-e-gul pe ashk-e-shabnam kalī kī palkeñ jhukī jhukī haiñ

vo aise baiThe hue haiñ jaise chaman nasīm-e-sahar se pahle

ufuq pe āñdhī chaḌhī huī hai bhañvar kī himmat baḌhī huī hai

bhañvar ko shāyad pata nahīñ hai junūñ bhañvar hai bhañvar se pahle

ye sub.h-e-kāzib hai sarfarosho abhī añdherā miTā nahīñ hai

na chain zulmat ko lene denā tulū’-e-nūr-e-sahar se pahle

nisār 'bazmī' ġhurūr us kā bas ek sajda qusūr us kā

jo 'arsh vāloñ meñ mo'tabar thā shu’ūr-e-nā-mo'tabar se pahle

‘ubur kar wadi-e-tazabzub faraaz ki rahguzar se pahle

mata'-e-‘azm-o-yaqin hai wajib safar mein raKHt-e-safar se pahle

ye mah-o-anjum sara surayya chaman bayaban KHizan bahaaran

hain sab haqiqat mein be-haqiqat haqiqat-e-muntazar se pahle

kahan the ye rah-o-rasm-e-manzil kahan the dar-o-rasan salasil

tha kaun maqtal mein sar-kashida tumhaare shorida-sar se pahle

khanak rahi hai abhi to pael baras rahe hain abhi to baadal

ye kya ki bahne laga hai kajal hujum-e-barq-o-sharar se pahle

mila jo mauqa' to ham-safiro main apni rudad yun kahunga

ki ro paDegi faza-e-mahmil huzur mein chashm-e-tar se pahle

hai ‘ariz-e-gul pe ashk-e-shabnam kali ki palken jhuki jhuki hain

wo aise baiThe hue hain jaise chaman nasim-e-sahar se pahle

ufuq pe aandhi chaDhi hui hai bhanwar ki himmat baDhi hui hai

bhanwar ko shayad pata nahin hai junun bhanwar hai bhanwar se pahle

ye subh-e-kazib hai sarfarosho abhi andhera miTa nahin hai

na chain zulmat ko lene dena tulu’-e-nur-e-sahar se pahle

nisar 'bazmi' ghurur us ka bas ek sajda qusur us ka

jo 'arsh walon mein mo'tabar tha shu’ur-e-na-mo'tabar se pahle