uD kar suragh-e-kucha-e-dilbar lagaiye

uḌ kar surāġh-e-kūcha-e-dilbar lagā.iye

kis tarah donoñ bāzuoñ meñ par lagā.iye

ik tiir dil par ek jigar par lagā.iye

hissa lagā.iye to barābar lagā.iye

phūloñ meñ topiye mujhe nāzuk-dimāġh huuñ

lillāh is lahad meñ na patthar lagā.iye

jab bazm-e-yār meñ hai takalluf rasā.ī kā

ḳhalvat-sarā-e-ḳhās meñ bistar lagā.iye

har dam kiyā kare rag-e-jāñ marhabā kā shor

is nok-jhoñk se koī nashtar lagā.iye

barsoñ se be-qarār hai taskīn ke liye

jhukiye zarā jigar se mire sar lagā.iye

kyā bastanī qafas kī ye bulbul ko bhejiye

hisse meñ us ke phūloñ kī chādar lagā.iye

jā apne dil meñ dījiye mujh sāf-qalb ko

ā.īne meñ shabīh-e-sikandar lagā.iye

yāvar nasīb ho to hasīnoñ ko chāhiye

dil un se aazmā ke muqaddar lagā.iye

aksar vo kahte haiñ ki jo bosa talab kare

is guftugū pe muñh ise kyūñkar lagā.iye

aa.e dahān-e-zaḳhm se āvāz aur aur

is is adā-o-nāz se ḳhanjar lagā.iye

purze mire uḌā.iye bhejā hai maiñ ne ḳhat

be-jurm kyuuñ kabāb-e-kabūtar lagā.iye

sūrat jo ek ek kī taktā hai aa.ina

hasrat ye hai surāġh-e-sikandar lagā.iye

haiñ aap to tamām ḳhudā.ī ke nāḳhudā

merā jahāz bhī lab-e-kausar lagā.iye

barham-mizāj ho ke vo bargashtagī kare

daftar meñ jis ke fard-e-muqaddar lagā.iye

daulat jo mujh ġharīb kī luuTī hai aap ne

kyā kījiyegā hissa-e-lashkar lagā.iye

jitnoñ kī jāneñ liiñ haiñ unheñ ḳhūñ-bahā mile

puurā hisāb dekh ke daftar lagā.iye

us gul kī aa hī jā.egī ḳhushbū dimāġh meñ

chaliye riyāz-e-ishq meñ chakkar lagā.iye

ifshā kiyā jo ishq to jhuñjhlā ke bole vo

likhvā ke ishtihār ye ghar ghar lagā.iye

sau jā se dil phaTā hai kalejā hai chaak chaak

paivand phaaḌ phaaḌ ke chādar lagā.iye

phir uTh ke tere haath se kaTvā.iye galā

kyūñ-kar dobāra jism meñ phir sar lagā.iye

saath is qadar haiñ us shah-e-ḳhūbāñ ke sarfarosh

barsoñ hisāb kasrat-e-lashkar lagā.iye

kahte haiñ laḳht-e-dil ko vo bāzār-e-husn meñ

saudā ye mere urdu se bāhar lagā.iye

mujh se lagāvaT aap kī shamshīr kartī hai

martā huuñ us pe is ko mire sar lagā.iye

sailāb-e-ashk ne mire raste kiye haiñ band

kashtī mañgā ke muttasil-e-dar lagā.iye

ḳhil.at shahīd-e-nāz ko bhijvāte haiñ javāb

kashtī meñ pahle phūloñ kī chādar lagā.iye

pahuñchā ke ḳhat halāl huā hai ye ai 'sharaf'

āñkhoñ se le ke ḳhūn-e-kabūtar lagā.iye

uD kar suragh-e-kucha-e-dilbar lagaiye

kis tarah donon bazuon mein par lagaiye

ek tir dil par ek jigar par lagaiye

hissa lagaiye to barabar lagaiye

phulon mein topiye mujhe nazuk-dimagh hun

lillah is lahad mein na patthar lagaiye

jab bazm-e-yar mein hai takalluf rasai ka

KHalwat-sara-e-KHas mein bistar lagaiye

har dam kiya kare rag-e-jaan marhaba ka shor

is nok-jhonk se koi nashtar lagaiye

barson se be-qarar hai taskin ke liye

jhukiye zara jigar se mere sar lagaiye

kya bastani qafas ki ye bulbul ko bhejiye

hisse mein us ke phulon ki chadar lagaiye

ja apne dil mein dijiye mujh saf-qalb ko

aaine mein shabih-e-sikandar lagaiye

yawar nasib ho to hasinon ko chahiye

dil un se aazma ke muqaddar lagaiye

aksar wo kahte hain ki jo bosa talab kare

is guftugu pe munh ise kyunkar lagaiye

aae dahan-e-zaKHm se aawaz aur aur

is is ada-o-naz se KHanjar lagaiye

purze mere uDaiye bheja hai main ne KHat

be-jurm kyun kabab-e-kabutar lagaiye

surat jo ek ek ki takta hai aaina

hasrat ye hai suragh-e-sikandar lagaiye

hain aap to tamam KHudai ke naKHuda

mera jahaz bhi lab-e-kausar lagaiye

barham-mizaj ho ke wo bargashtagi kare

daftar mein jis ke fard-e-muqaddar lagaiye

daulat jo mujh gharib ki luTi hai aap ne

kya kijiyega hissa-e-lashkar lagaiye

jitnon ki jaanen lin hain unhen KHun-baha mile

pura hisab dekh ke daftar lagaiye

us gul ki aa hi jaegi KHushbu dimagh mein

chaliye riyaz-e-ishq mein chakkar lagaiye

ifsha kiya jo ishq to jhunjhla ke bole wo

likhwa ke ishtihaar ye ghar ghar lagaiye

sau ja se dil phaTa hai kaleja hai chaak chaak

paiwand phaD phaD ke chadar lagaiye

phir uTh ke tere hath se kaTwaiye gala

kyun-kar dobara jism mein phir sar lagaiye

sath is qadar hain us shah-e-KHuban ke sarfarosh

barson hisab kasrat-e-lashkar lagaiye

kahte hain laKHt-e-dil ko wo bazar-e-husn mein

sauda ye mere urdu se bahar lagaiye

mujh se lagawaT aap ki shamshir karti hai

marta hun us pe is ko mere sar lagaiye

sailab-e-ashk ne mere raste kiye hain band

kashti manga ke muttasil-e-dar lagaiye

KHilat shahid-e-naz ko bhijwate hain jawab

kashti mein pahle phulon ki chadar lagaiye

pahuncha ke KHat halal hua hai ye ai 'sharaf'

aankhon se le ke KHun-e-kabutar lagaiye