udas rahne ki aadaton ka shikar ho kar

udaas rahne kī ādatoñ kā shikār ho kar

tū rah na jaanā ai zindagī tār-tār ho kar

faqat sharāboñ ke aasre kaT rahe haiñ din-rāt

utar chukā ham ko aur to har ḳhumār ho kar

ham apne hone kī ḳhush-gumānī meñ chuur the jab

guzar ga.ī ham se yād-e-parvardigār ho kar

ye be-yaqīnī hai aadmī tak to Thiik lekin

maiñ rah na jā.ūñ ḳhudā se be-e'tibār ho kar

maiñ kab se qaid-e-vajūd meñ ghuT rahā huuñ lekin

mujhe sukūñ bhī nahīñ hai ḳhud se farār ho kar

vo bhole-pan ko pahan ke phirtā hai is jahāñ meñ

tum us se milnā to bas zarā hoshiyār ho kar

vo kaam jis kī hameñ tavaqqo thī dushmanoñ se

amal meñ kuchh log laa.e to haiñ pa yaar ho kar

abhī to un ko fazā meñ har samt thā mahaknā

jo ḳhushbueñ rah ga.iiñ supurd-e-ġhubār ho kar

'amar' kahīñ khul na jaa.e hālat sukūn-e-dil kī

milo har ik shaḳhs se baḌe be-qarār ho kar

udas rahne ki aadaton ka shikar ho kar

tu rah na jaana ai zindagi tar-tar ho kar

faqat sharabon ke aasre kaT rahe hain din-raat

utar chuka hum ko aur to har KHumar ho kar

hum apne hone ki KHush-gumani mein chur the jab

guzar gai hum se yaad-e-parwardigar ho kar

ye be-yaqini hai aadmi tak to Thik lekin

main rah na jaun KHuda se be-e'tibar ho kar

main kab se qaid-e-wajud mein ghuT raha hun lekin

mujhe sukun bhi nahin hai KHud se farar ho kar

wo bhole-pan ko pahan ke phirta hai is jahan mein

tum us se milna to bas zara hoshiyar ho kar

wo kaam jis ki hamein tawaqqo thi dushmanon se

amal mein kuchh log lae to hain pa yar ho kar

abhi to un ko faza mein har samt tha mahakna

jo KHushbuen rah gain supurd-e-ghubar ho kar

'amar' kahin khul na jae haalat sukun-e-dil ki

milo har ek shaKHs se baDe be-qarar ho kar