udas tum hi nahin ho hayat hai shayad

udaas tum hī nahīñ ho hayāt hai shāyad

thakī thakī se kahīñ kā.enāt hai shāyad

rukī rukī sī ye sāñseñ jhukī jhukī sī nigāh

us ek baat meñ ik aur baat hai shāyad

maiñ tum ko jiit rahā huuñ tumheñ patā hī nahīñ

ye aur baat ki merī hī maat hai shāyad

kahāñ kā ishq magar us ko kaun samjhā.e

parī-ḳhisāl farishta-sifāt hai shāyad

zamīn jaagī huī hai zamāna jaagā huā

ki aaj raat koī vārdāt hai shāyad

har ek gaam pe raushan karo diye se diyā

tulū-e-sub.h se pahle najāt hai shāyad

abhī to sham.a se shabnam banegī aañkh 'sanā'

abhī to ek pahar aur raat hai shāyad

udas tum hi nahin ho hayat hai shayad

thaki thaki se kahin kaenat hai shayad

ruki ruki si ye sansen jhuki jhuki si nigah

us ek baat mein ek aur baat hai shayad

main tum ko jit raha hun tumhein pata hi nahin

ye aur baat ki meri hi mat hai shayad

kahan ka ishq magar us ko kaun samjhae

pari-KHisal farishta-sifat hai shayad

zamin jagi hui hai zamana jaga hua

ki aaj raat koi wardat hai shayad

har ek gam pe raushan karo diye se diya

tulu-e-subh se pahle najat hai shayad

abhi to shama se shabnam banegi aankh 'sana'

abhi to ek pahar aur raat hai shayad