udas udas hai baad-e-sahar nahin malum

udaas udaas hai bād-e-sahar nahīñ mā'lūm

kahāñ kahāñ se huā hai guzar nahīñ mā'lūm

na rakh sakā sar-e-mahfil vo aabrū kā bharam

ki pāsdārī-e-'arz-e-hunar nahīñ mā'lūm

chalā thā dil meñ liye ik navā-e-shauq magar

kidhar safar hai kidhar ham-safar nahīñ mā'lūm

machī hai dhuum mire shahr se nikalne kī

kahāñ se nashr huī ye ḳhabar nahīñ mā'lūm

hujūm-e-ġham ne sañvārā hai shab kī dul.han ko

ki kis tarah se huī shab basar nahīñ mā'lūm

jahāñ-jahāñ vo mile aañkh un kī bhar aa.ī

ye kyoñ udhar bhī huā hai asar nahīñ mā'lūm

huā jo zulf-e-girah-gīr kā asiir 'adīb'

kahāñ hai shaam kahāñ hai sahar nahīñ mā'lūm

udas udas hai baad-e-sahar nahin ma'lum

kahan kahan se hua hai guzar nahin ma'lum

na rakh saka sar-e-mahfil wo aabru ka bharam

ki pasdari-e-'arz-e-hunar nahin ma'lum

chala tha dil mein liye ek nawa-e-shauq magar

kidhar safar hai kidhar ham-safar nahin ma'lum

machi hai dhum mere shahr se nikalne ki

kahan se nashr hui ye KHabar nahin ma'lum

hujum-e-gham ne sanwara hai shab ki dulhan ko

ki kis tarah se hui shab basar nahin ma'lum

jahan-jahan wo mile aankh un ki bhar aai

ye kyon udhar bhi hua hai asar nahin ma'lum

hua jo zulf-e-girah-gir ka asir 'adib'

kahan hai sham kahan hai sahar nahin ma'lum