اداسی گھر میں رکھی کچھ خوشی چہرے پہ مل آئے

اداسی گھر میں رکھی کچھ خوشی چہرے پہ مل آئے

ہمیں لوگوں میں آنا تھا سو ہم چہرہ بدل آئے

ضروری تھا زمانے سے مراسم کا بھرم رکھنا

سو تھوڑی دیر ہم بھی رنگ میں دنیا کے ڈھل آئے

تمنا جس کی بر آئے وہ قسمت کب ہماری تھی

امیدوں کے شجر کو کیوں ہمارے کوئی پھل آئے

یہی اک راہ باقی تھی انا کی پاسداری کی

ضرورت کے تھے جتنے سانپ سب کے پھن کچل آئے

ہمیں بھی تشنگی کا تجربہ ہونا ضروری تھا

سو تپتی دھوپ میں صحرا کی کچھ دن ہم بھی جل آئے

وہی بے رنگ دیواریں وہی بے نور دروازہ

کہاں تک دیکھتے رہتے سو ہم گھر سے نکل آئے

ہمیں بھی اب کہاں اس زندگی سے آس ہے باقی

قضا آنا ہی جب ٹھہری تو آج آئے کہ کل آئے