udasi ghar mein rakkhi kuchh KHushi chehre pe mal aae

udāsī ghar meñ rakkhī kuchh ḳhushī chehre pe mal aa.e

hameñ logoñ meñ aanā thā so ham chehra badal aa.e

zarūrī thā zamāne se marāsim kā bharam rakhnā

so thoḌī der ham bhī rang meñ duniyā ke Dhal aa.e

tamanna jis kī bar aa.e vo qismat kab hamārī thī

umīdoñ ke shajar ko kyoñ hamāre koī phal aa.e

yahī ik raah baaqī thī anā kī pāsdārī kī

zarūrat ke the jitne saañp sab ke phan kuchal aa.e

hameñ bhī tishnagī kā tajraba honā zarūrī thā

so taptī dhuup meñ sahrā kī kuchh din ham bhī jal aa.e

vahī be-rang dīvāreñ vahī be-nūr darvāza

kahāñ tak dekhte rahte so ham ghar se nikal aa.e

hameñ bhī ab kahāñ is zindagī se aas hai baaqī

qazā aanā hī jab Thahrī to aaj aa.e ki kal aa.e

udasi ghar mein rakkhi kuchh KHushi chehre pe mal aae

hamein logon mein aana tha so hum chehra badal aae

zaruri tha zamane se marasim ka bharam rakhna

so thoDi der hum bhi rang mein duniya ke Dhal aae

tamanna jis ki bar aae wo qismat kab hamari thi

umidon ke shajar ko kyon hamare koi phal aae

yahi ek rah baqi thi ana ki pasdari ki

zarurat ke the jitne sanp sab ke phan kuchal aae

hamein bhi tishnagi ka tajraba hona zaruri tha

so tapti dhup mein sahra ki kuchh din hum bhi jal aae

wahi be-rang diwaren wahi be-nur darwaza

kahan tak dekhte rahte so hum ghar se nikal aae

hamein bhi ab kahan is zindagi se aas hai baqi

qaza aana hi jab Thahri to aaj aae ki kal aae