udasiyon ke siwa dil ki zindagi kya hai

udāsiyoñ ke sivā dil kī zindagī kyā hai

koī batā.e ki ḳhvāboñ kī barhamī kyā hai

kabhī chaman se jo guzre chaman se ḳhud pūchhe

sabā mizāj-e-chaman ham se pūchhtī kyā hai

ye tīragi-e-musalsal hazār baar qubūl

magar ye daur charāġhoñ kī raushnī kyā hai

ye ahl-e-dil ki uḌāte haiñ mere ġham kā mazāq

ye be-hisī jo nahīñ hai to be-hisī kyā hai

na pūchh mujh se jo kār-e-savāb meñ hai maza

ye pūchh mujh se gunāhoñ meñ dilkashī kyā hai

mashām-e-jāñ na mo.attar ho jis se vo gul kyā

jo nashsha lā na sake vo sharāb hī kyā hai

nazar se duur hai 'jazbī' savād-e-manzil tak

na jaane zauq-e-talab meñ mire kamī kyā hai

udasiyon ke siwa dil ki zindagi kya hai

koi batae ki KHwabon ki barhami kya hai

kabhi chaman se jo guzre chaman se KHud puchhe

saba mizaj-e-chaman hum se puchhti kya hai

ye tiragi-e-musalsal hazar bar qubul

magar ye daur charaghon ki raushni kya hai

ye ahl-e-dil ki uDate hain mere gham ka mazaq

ye be-hisi jo nahin hai to be-hisi kya hai

na puchh mujh se jo kar-e-sawab mein hai maza

ye puchh mujh se gunahon mein dilkashi kya hai

masham-e-jaan na moattar ho jis se wo gul kya

jo nashsha la na sake wo sharab hi kya hai

nazar se dur hai 'jazbi' sawad-e-manzil tak

na jaane zauq-e-talab mein mere kami kya hai