اڑاتا روندتا ہر راہ کیف و کم نکلا

اڑاتا روندتا ہر راہ کیف و کم نکلا

پس غبار نفس شہ سوار غم نکلا

ہر اک نمود میں شامل تھا وہم جبر کا لطف

ہر اک وجود عزا خانۂ کرم نکلا

سنا تو یہ تھا جہان دگر ہے تیرا دیار

مگر ہر ایک یہاں کشتۂ ستم نکلا

تمام کوچہ و بازار دست بستہ تھے

کچھ اس ادا سے مرے عشق کا علم نکلا

چلا تھا روح سے ملنے وہ دل زدہ مسکیں

مگر غریب کا راہ بدن میں دم نکلا

کوئی جگہ نہ ملی ماورائے سود و زیاں

ہر اک مقام پہ امکان بیش و کم نکلا