uDe hosh bahki nazar nashsha chhaya

uḌe hosh bahkī nazar nashsha chhāyā

vo aa.e ki jām-e-mai-e-nāb aayā

mohabbat hai muflis kī taqsīr shāyad

ise laakh pardoñ meñ 'uryāñ hī paayā

musībat kā ehsān bhūlūñ to kyūñkar

musībat paḌī to ḳhudā yaad aayā

ḳhalish se hai dil meñ taḌap sī hai jaañ meñ

vo aa.e ki jiine kā andāz aayā

ye hai qissa-e-zindagī kā ḳhulāsa

jo paayā vo khoyā jo khoyā na paayā

parastish jo kī to ḳhudī kī parastish

jhukāyā to sar apne aage jhukāyā

shikasta huā dil to kuchh aur nikhrā

shahāb aur bhī Tuut kar jagmagāyā

na samjhe ḳhudī ko na samjhe ḳhudā ko

na jiinā hī aayā na marnā hī aayā

ka.ī baar phūñkā jise bijliyoñ ne

usī shāḳh par āshiyāna banāyā

jahāñ meñ na hañste banī hai na rote

ḳhushī raas aa.ī na ġham raas aayā

javānī ne jab sāz-e-hastī ko chheḌā

zamīñ gungunā.ī falak gungunāyā

zamāne ke dil kī sadā ban ke 'rā'nā'

zamāne ko mere suḳhan ne jagāyā

uDe hosh bahki nazar nashsha chhaya

wo aae ki jam-e-mai-e-nab aaya

mohabbat hai muflis ki taqsir shayad

ise lakh pardon mein 'uryan hi paya

musibat ka ehsan bhulun to kyunkar

musibat paDi to KHuda yaad aaya

KHalish se hai dil mein taDap si hai jaan mein

wo aae ki jine ka andaz aaya

ye hai qissa-e-zindagi ka KHulasa

jo paya wo khoya jo khoya na paya

parastish jo ki to KHudi ki parastish

jhukaya to sar apne aage jhukaya

shikasta hua dil to kuchh aur nikhra

shahab aur bhi Tut kar jagmagaya

na samjhe KHudi ko na samjhe KHuda ko

na jina hi aaya na marna hi aaya

kai bar phunka jise bijliyon ne

usi shaKH par aashiyana banaya

jahan mein na hanste bani hai na rote

KHushi ras aai na gham ras aaya

jawani ne jab saz-e-hasti ko chheDa

zamin gungunai falak gungunaya

zamane ke dil ki sada ban ke 'ra'na'

zamane ko mere suKHan ne jagaya