ادھر فلک پہ کوئی دن نکلنے والا تھا

ادھر فلک پہ کوئی دن نکلنے والا تھا

ادھر یہ دل کہ اداسی میں ڈھلنے والا تھا

بہا کے لے گئیں مجھ کو چلو یہ موجیں ہی

میں خود کشی کا ارادہ بدلنے والا تھا

وہ صبح عشق کئی رتجگوں کا حاصل تھی

مرے نصیب کا سورج نکلنے والا تھا

ترے فریب میں آنا تو میری مرضی تھی

میں جانتا تھا ترا حسن چھلنے والا تھا

دنوں کے بعد بڑا خوشگوار تھا موسم

قفس سے کوئی پرندہ نکلنے والا تھا

میں ان نگاہوں سے بچنے کی کیا دعا کرتا

یہ حادثہ بھی کبھی سر سے ٹلنے والا تھا

نگاہ پھیر لی اس نے ہی وقت پر ورنہ

میں ان چراغ سی آنکھوں میں جلنے والا تھا