udhar mazhab idhar insan ki fitrat ka taqaza hai

udhar maz.hab idhar insāñ kī fitrat kā taqāzā hai

vo dāmān-e-mah-e-kan.āñ hai ye dast-e-zuleḳhā hai

idhar terī mashiyyat hai udhar hikmat rasūloñ kī

ilāhī aadmī ke baab meñ kyā hukm hotā hai

ye maanā donoñ hī dhoke haiñ rindī ho ki darveshī

magar ye dekhnā hai kaun sā rañgīn dhokā hai

khilaunā to nihāyat shoḳh o rañgīñ hai tamaddun kā

muārrif maiñ bhī huuñ lekin khilaunā phir khilaunā hai

mire aage to ab kuchh din se har aañsū mohabbat kā

kanār-e-āb-e-ruknābād o gulgasht-e-musallā hai

mujhe mālūm hai jo kuchh tamannā hai rasūloñ kī

magar kyā dar-haqīqat vo ḳhudā kī bhī tamannā hai

mashiyyat khelnā zebā nahīñ merī basīrat se

uThā le in khilaunoñ ko ye duniyā hai vo uqbā hai

udhar mazhab idhar insan ki fitrat ka taqaza hai

wo daman-e-mah-e-kanan hai ye dast-e-zuleKHa hai

idhar teri mashiyyat hai udhar hikmat rasulon ki

ilahi aadmi ke bab mein kya hukm hota hai

ye mana donon hi dhoke hain rindi ho ki darweshi

magar ye dekhna hai kaun sa rangin dhoka hai

khilauna to nihayat shoKH o rangin hai tamaddun ka

muarrif main bhi hun lekin khilauna phir khilauna hai

mere aage to ab kuchh din se har aansu mohabbat ka

kanar-e-ab-e-ruknabaad o gulgasht-e-musalla hai

mujhe malum hai jo kuchh tamanna hai rasulon ki

magar kya dar-haqiqat wo KHuda ki bhi tamanna hai

mashiyyat khelna zeba nahin meri basirat se

uTha le in khilaunon ko ye duniya hai wo uqba hai