uf ye bhi koi hile bahane ka waqt hai

uf ye bhī koī hiile bahāne kā vaqt hai

hai roz-e-‘īd milne milāne kā vaqt hai

chhoḌo ye marsiya ki tarāne kā vaqt hai

ye vaqt un ke bazm meñ aane kā vaqt hai

hālāt kah rahe haiñ yahī ham se baar baar

kāñToñ ke biich phuul khilāne kā vaqt hai

kyā ḳhuub hai ki barkat-o-zīnat-fishānī kā

hai vo hī vaqt un ke jo aane kā vaqt hai

kyūñkar juTā rahe ho agar zindagī hai ḳhaak

rāh-e-vafā meñ is ko uḌāne kā vaqt hai

utnā hī muskurāo baḌhe jis qadar hī dard

ye vaqt tāb-e-zabt dikhāne kā vaqt hai

tum ko to karnā aa gayā āñkhoñ se guftugū

mat socho ye hī dil ke lagāne kā vaqt hai

ai ḳhvāhisho ḳhudā kī 'atā ke tufail meñ

ab tum ko uñgliyoñ pe nachāne kā vaqt hai

uf ye bhi koi hile bahane ka waqt hai

hai roz-e-‘id milne milane ka waqt hai

chhoDo ye marsiya ki tarane ka waqt hai

ye waqt un ke bazm mein aane ka waqt hai

haalat kah rahe hain yahi hum se bar bar

kanTon ke bich phul khilane ka waqt hai

kya KHub hai ki barkat-o-zinat-fishani ka

hai wo hi waqt un ke jo aane ka waqt hai

kyunkar juTa rahe ho agar zindagi hai KHak

rah-e-wafa mein is ko uDane ka waqt hai

utna hi muskurao baDhe jis qadar hi dard

ye waqt tab-e-zabt dikhane ka waqt hai

tum ko to karna aa gaya aankhon se guftugu

mat socho ye hi dil ke lagane ka waqt hai

ai KHwahisho KHuda ki 'ata ke tufail mein

ab tum ko ungliyon pe nachane ka waqt hai