ufaq ko takti hain muddat se be-shumar aankhen

ufaq ko taktī haiñ muddat se be-shumār āñkheñ

sahar kā ḳhvāb liye sab umīd-vār āñkheñ

maiñ jāntā huuñ ki hargiz na aa.egā ab vo

nibhā.e jaatī haiñ par farz-e-intizār āñkheñ

vo dekh paa.e zamāne ko merī nazroñ se

use ai kaash mirī de sakūñ udhār āñkheñ

mujhe dilātī haiñ jañgal meñ hone kā ehsās

ye shahr vāloñ kī ayyār-o-hoshiyār āñkheñ

bichhaḌte vaqt vo royā to thā magar 'rāqim'

masarratoñ meñ bhī hotī haiñ ashk-bār āñkheñ

ufaq ko takti hain muddat se be-shumar aankhen

sahar ka KHwab liye sab umid-war aankhen

main jaanta hun ki hargiz na aaega ab wo

nibhae jati hain par farz-e-intizar aankhen

wo dekh pae zamane ko meri nazron se

use ai kash meri de sakun udhaar aankhen

mujhe dilati hain jangal mein hone ka ehsas

ye shahr walon ki ayyar-o-hoshiyar aankhen

bichhaDte waqt wo roya to tha magar 'raqim'

masarraton mein bhi hoti hain ashk-bar aankhen