ufuq ke us par zindagi ke udas lamhe guzar aaun

ufuq ke us paar zindagī ke udaas lamhe guzār aa.uuñ

agar mirā saath de sako tum to maut ko bhī pukār aa.uuñ

kuchh is tarah jī rahā huuñ jaise uThā.e phirtā huuñ laash apnī

jo tum zarā sā bhī do sahārā to bār-e-hastī utaar aa.uuñ

badal ga.e zindagī ke mehvar tavāf-e-dair-o-haram kahāñ kā

tumhārī mahfil agar ho baaqī to maiñ bhī parvāna-vār aa.uuñ

koī to aisā maqām hogā jahāñ mujhe bhī sukūñ milegā

zamīñ ke tevar badal rahe haiñ to āsmāñ ko sañvār aa.uuñ

agarche isrār-e-be-ḳhudī hai tujhe bhī zar-posh mahfiloñ meñ

mujhe bhī zid hai ki tere dil meñ nuqūsh-e-māzī ubhār aa.uuñ

sunā hai ek ajnabī sī manzil ko uTh rahe haiñ qadam tumhāre

burā na maano to rahnumā.ī ko maiñ sar-e-rahguzār aa.uuñ

ufuq ke us par zindagi ke udas lamhe guzar aaun

agar mera sath de sako tum to maut ko bhi pukar aaun

kuchh is tarah ji raha hun jaise uThae phirta hun lash apni

jo tum zara sa bhi do sahaara to bar-e-hasti utar aaun

badal gae zindagi ke mehwar tawaf-e-dair-o-haram kahan ka

tumhaari mahfil agar ho baqi to main bhi parwana-war aaun

koi to aisa maqam hoga jahan mujhe bhi sukun milega

zamin ke tewar badal rahe hain to aasman ko sanwar aaun

agarche israr-e-be-KHudi hai tujhe bhi zar-posh mahfilon mein

mujhe bhi zid hai ki tere dil mein nuqush-e-mazi ubhaar aaun

suna hai ek ajnabi si manzil ko uTh rahe hain qadam tumhaare

bura na mano to rahnumai ko main sar-e-rahguzar aaun