ufuq se dur bahut dur dekh sakta hun

ufuq se duur bahut duur dekh saktā huuñ

tirī zamīñ se baḌī ik zamīñ pe tanhā huuñ

vo ḳhush huā hai na ġhamgīn is ḳhabar se magar

zarūr thā ki kahūñ ḳhairiyat se achchhā huuñ

zarā qarīb se pūchho karegā sargoshī

maiñ aadmī to nahīñ aadmī kā dhokā huuñ

agar ho tesha-e-andesha haath meñ mere

yaqīn hotā hai maiñ parbatoñ se ūñchā huuñ

na is meñ rang hai koī na koī chehra hai

maiñ aa.ine ko magar duur se parakhtā huuñ

vo mehrbān murabbī to ho gayā ruḳhsat

ab apnī zaat se be-sūd kyoñ ulajhtā huuñ

ufuq se dur bahut dur dekh sakta hun

teri zamin se baDi ek zamin pe tanha hun

wo KHush hua hai na ghamgin is KHabar se magar

zarur tha ki kahun KHairiyat se achchha hun

zara qarib se puchho karega sargoshi

main aadmi to nahin aadmi ka dhoka hun

agar ho tesha-e-andesha hath mein mere

yaqin hota hai main parbaton se uncha hun

na is mein rang hai koi na koi chehra hai

main aaine ko magar dur se parakhta hun

wo mehrban murabbi to ho gaya ruKHsat

ab apni zat se be-sud kyon ulajhta hun