ujaD aankhon mein rat-jagon ka azab utra hai nim-shab ko

ujaaḌ āñkhoñ meñ rat-jagoñ kā azaab utrā hai nīm-shab ko

jo dard jaagā hai shaam Dhalte to sher likkhā hai nīm-shab ko

maiñ ḳhālī kamre ke sard goshe meñ roz tanhā ye sochtā huuñ

ye kaun hañstā hai din Dhale tak ye kaun rotā hai nīm-shab ko

hamāre bachchoñ kī sabz āñkhoñ meñ raushnī ke kañval nahīñ haiñ

udaas saayā sā roz aakar ye mujh se kahtā hai nīm-shab ko

duā.eñ le kar ham apne hoñToñ pe jaane kis sukh ke muntazir haiñ

hameñ ḳhabar hai ki is nagar meñ azaab utrā hai nīm-shab ko

dahakte sūraj kā zulm kachche gharoñ ke baasī hī jhelte haiñ

ye baat sochī nahīñ thī din meñ jo ḳhvāb dekhā hai nīm-shab ko

kise ḳhabar hai ye kaun sī shai vajūd-e-sham.a ko chāTtī hai

ye dekhte haiñ ki ek saaya laraztā rahtā hai nīm-shab ko

tumhārī yādoñ kī dhīmī lai hai yā maiñ huuñ yā phir koī nahīñ hai

to suune āñgan meñ kaun aakar diyā jalātā hai nīm-shab ko

ye āgahī ke udaas lamhoñ meñ karb kyā hai azaab kyā hai

vo jāntā hai jo apne rab kī tarah se tanhā hai nīm-shab ko

tum apne saare guzashta lamhe bhulā hī denā magar ye karnā

use duāoñ meñ yaad rakhnā jo tum ko rotā hai nīm-shab ko

agar kabhī tum miloge us se ye jaan lo ‘nūn-mīm-dānish'

vo aadmī hai jo dard paatā hai ḳhvāb botā hai nīm-shab ko

ujaD aankhon mein rat-jagon ka azab utra hai nim-shab ko

jo dard jaga hai sham Dhalte to sher likkha hai nim-shab ko

main KHali kamre ke sard goshe mein roz tanha ye sochta hun

ye kaun hansta hai din Dhale tak ye kaun rota hai nim-shab ko

hamare bachchon ki sabz aankhon mein raushni ke kanwal nahin hain

udas saya sa roz aakar ye mujh se kahta hai nim-shab ko

duaen le kar hum apne honTon pe jaane kis sukh ke muntazir hain

hamein KHabar hai ki is nagar mein azab utra hai nim-shab ko

dahakte suraj ka zulm kachche gharon ke basi hi jhelte hain

ye baat sochi nahin thi din mein jo KHwab dekha hai nim-shab ko

kise KHabar hai ye kaun si shai wajud-e-shama ko chaTti hai

ye dekhte hain ki ek saya larazta rahta hai nim-shab ko

tumhaari yaadon ki dhimi lai hai ya main hun ya phir koi nahin hai

to sune aangan mein kaun aakar diya jalata hai nim-shab ko

ye aagahi ke udas lamhon mein karb kya hai azab kya hai

wo jaanta hai jo apne rab ki tarah se tanha hai nim-shab ko

tum apne sare guzashta lamhe bhula hi dena magar ye karna

use duaon mein yaad rakhna jo tum ko rota hai nim-shab ko

agar kabhi tum miloge us se ye jaan lo ‘nun-mim-danish'

wo aadmi hai jo dard pata hai KHwab bota hai nim-shab ko