ujaDega jo tu kya faeda ai baghban hoga

ujāḌegā jo tū kyā fā.eda ai bāġhbāñ hogā

ḳhudā rakkhe mirī āñkhoñ meñ terā āshiyāñ hogā

ruḳh-e-raushan na un kā merī āñkhoñ se nihāñ hogā

jal uTThegī naqāb-e-ruḳh jo pardā darmiyāñ hogā

koī sayyād se kah de chhurī kī kyā zarūrat hai

qafas meñ jaan de dūñgā jo zikr-e-āshiyāñ hogā

sitam hai mere aage tum ne mere dil ko yuuñ kosā

ki jā kam-baḳht tū āvāra-e-kū-e-butāñ hogā

sitam-ārā.iyāñ us kī na dekhī jā.eñgī is se

chhupā legī zamīñ ham ko jo dushman āsmāñ hogā

falak ban ban ke TuuTe haiñ hamārī qabr ke taḳhte

ḳhabar is kī na thī zer-e-zamīñ bhī āsmāñ hogā

shabāb aane se pahle ahl-e-dil mar jā.eñge tum par

tumhāre ahd meñ kaahe ko ab koī javāñ hogā

milegī daad kuchh ahl-e-nazar se mujh ko ai 'safdar'

mirā zehn-e-rasā sharminda-e-ahl-e-zamāñ hogā

ujaDega jo tu kya faeda ai baghban hoga

KHuda rakkhe meri aankhon mein tera aashiyan hoga

ruKH-e-raushan na un ka meri aankhon se nihan hoga

jal uTThegi naqab-e-ruKH jo parda darmiyan hoga

koi sayyaad se kah de chhuri ki kya zarurat hai

qafas mein jaan de dunga jo zikr-e-ashiyan hoga

sitam hai mere aage tum ne mere dil ko yun kosa

ki ja kam-baKHt tu aawara-e-ku-e-butan hoga

sitam-araiyan us ki na dekhi jaengi is se

chhupa legi zamin hum ko jo dushman aasman hoga

falak ban ban ke TuTe hain hamari qabr ke taKHte

KHabar is ki na thi zer-e-zamin bhi aasman hoga

shabab aane se pahle ahl-e-dil mar jaenge tum par

tumhaare ahd mein kahe ko ab koi jawan hoga

milegi dad kuchh ahl-e-nazar se mujh ko ai 'safdar'

mera zehn-e-rasa sharminda-e-ahl-e-zaman hoga