ujala chhin raha hai raushni taqsim hoti hai

ujālā chhin rahā hai raushnī taqsīm hotī hai

tirī āvāz hai yā zindagī taqsīm hotī hai

kabhī reg-e-ravāñ se pyaas bujh jaatī hai rahrav kī

kabhī dariyā ke hāthoñ tishnagī taqsīm hotī hai

yahī vo moḌ hai apne parā.e chhūT jaate haiñ

qarīb-e-kū-e-jānāñ gumrahī taqsīm hotī hai

ḳhushī ke naam par āñkhoñ meñ aañsū aa hī jaate haiñ

ba-qadr-e-ġham mohabbat meñ ḳhushī taqsīm hotī hai

yaqīñ aayā tire shādāb paikar kī khanak sun kar

badan ke zāviyoñ meñ yuuñ hañsī taqsīm hotī hai

qayāmat hai diloñ ke darmiyāñ dīvār uThāte ho

diloñ ke dard kī hamsā.egī taqsīm hotī hai

vahīñ kal vaqt ne khaa.ī thī Thokar yaad hai ab tak

vo pech-o-ḳham jahāñ terī galī taqsīm hotī hai

sar-e-pahnā-e-naġhma 'shāz' kuchh sho.ala sā uThtā hai

sunā hai daulat-e-paiġhambarī taqsīm hotī hai

ujala chhin raha hai raushni taqsim hoti hai

teri aawaz hai ya zindagi taqsim hoti hai

kabhi reg-e-rawan se pyas bujh jati hai rahraw ki

kabhi dariya ke hathon tishnagi taqsim hoti hai

yahi wo moD hai apne parae chhuT jate hain

qarib-e-ku-e-jaanan gumrahi taqsim hoti hai

KHushi ke nam par aankhon mein aansu aa hi jate hain

ba-qadr-e-gham mohabbat mein KHushi taqsim hoti hai

yaqin aaya tere shadab paikar ki khanak sun kar

badan ke zawiyon mein yun hansi taqsim hoti hai

qayamat hai dilon ke darmiyan diwar uThate ho

dilon ke dard ki hamsaegi taqsim hoti hai

wahin kal waqt ne khai thi Thokar yaad hai ab tak

wo pech-o-KHam jahan teri gali taqsim hoti hai

sar-e-pahna-e-naghma 'shaz' kuchh shoala sa uThta hai

suna hai daulat-e-paighambari taqsim hoti hai