ujala tira-shabi se daba daba sa laga

ujālā tīra-shabī se dabā dabā sā lagā

charāġh jaltā huā bhī bujhā bujhā sā lagā

talāsh-e-amn meñ laa.ī jahāñ-jahāñ parvāz

khulī fazā thī magar dam ghuTā ghuTā sā lagā

vafā kī raah meñ apnā har ek naqsh-e-qadam

havā-e-kam-nigahī se miTā miTā sā lagā

nigāh-e-shauq-e-tajassus jidhar jidhar bhī ga.ī

ruḳh-e-hayāt kā parda uThā uThā sā lagā

jo dekhā ġhaur se ā.īna-e-siyah-baḳhtī

ḳhud apne jism kā saaya judā judā sā lagā

zamāna chaḌhtī huī dhuup dekhtā hai magar

yahāñ to sub.h kā sūraj Dhalā Dhalā sā lagā

tamām umr bhigotā rahā mirī palkeñ

vo ek lamha jo dil ko bhalā bhalā sā lagā

yahī vo dasht-e-junūñ-ḳhez hai jahāñ 'ahmar'

har ek qāfla-e-ġham luTā luTā sā lagā

ujala tira-shabi se daba daba sa laga

charagh jalta hua bhi bujha bujha sa laga

talash-e-amn mein lai jahan-jahan parwaz

khuli faza thi magar dam ghuTa ghuTa sa laga

wafa ki rah mein apna har ek naqsh-e-qadam

hawa-e-kam-nigahi se miTa miTa sa laga

nigah-e-shauq-e-tajassus jidhar jidhar bhi gai

ruKH-e-hayat ka parda uTha uTha sa laga

jo dekha ghaur se aaina-e-siyah-baKHti

KHud apne jism ka saya juda juda sa laga

zamana chaDhti hui dhup dekhta hai magar

yahan to subh ka suraj Dhala Dhala sa laga

tamam umr bhigota raha meri palken

wo ek lamha jo dil ko bhala bhala sa laga

yahi wo dasht-e-junun-KHez hai jahan 'ahmar'

har ek qafla-e-gham luTa luTa sa laga