ujalon ka agar dushman nahin hai

ujāloñ kā agar dushman nahīñ hai

añdheroñ se bhī vo bad-zan nahīñ hai

hamāre paas koī dhan nahīñ hai

bahut ārām hai uljhan nahīñ hai

mire bartan meñ hai mehnat kī roTī

kisī kī deg kī khurchan nahīñ hai

mirī poshāk par kyuuñ hans rahā hai

ye apnī hai tirī utran nahīñ hai

ġharīboñ ke liye ab bhī jahāñ meñ

koī manzil koī maskan nahīñ hai

baḌā dilkash hai chehra zindagī kā

magar vo rang vo roġhan nahīñ hai

nazar meñ raushnī aa.e kahāñ se

charāġh-e-dil hī jab raushan nahīñ hai

koī qātil nahīñ hai is nagar meñ

magar baaqī koī gardan nahīñ hai

mire ghar meñ 'zafar' sab kuchh hai lekin

barā.e-nām bhī āñgan nahīñ hai

ujalon ka agar dushman nahin hai

andheron se bhi wo bad-zan nahin hai

hamare pas koi dhan nahin hai

bahut aaram hai uljhan nahin hai

mere bartan mein hai mehnat ki roTi

kisi ki deg ki khurchan nahin hai

meri poshak par kyun hans raha hai

ye apni hai teri utran nahin hai

gharibon ke liye ab bhi jahan mein

koi manzil koi maskan nahin hai

baDa dilkash hai chehra zindagi ka

magar wo rang wo roghan nahin hai

nazar mein raushni aae kahan se

charagh-e-dil hi jab raushan nahin hai

koi qatil nahin hai is nagar mein

magar baqi koi gardan nahin hai

mere ghar mein 'zafar' sab kuchh hai lekin

barae-nam bhi aangan nahin hai