ujDa ujDa shahr-e-tamanna kaise ise aabaad karen

ujḌā ujḌā shahr-e-tamannā kaise ise ābād kareñ

tum hī qātil tum hī aadil ham kis se fariyād kareñ

amn-o-uḳhuvvat apnā maslak mehr-o-vafā hai apnā diin

apnā to ye kaam nahīñ hai zulm-o-istibdād kareñ

ḳhush-fahmī kī patvāroñ se kashtī khenā kyā ma.anī

kuchh socheñ kuchh raah nikāleñ vaqt na yuuñ barbād kareñ

ahl-e-junūñ ne jis bastī ko tārāj-o-pāmāl kiyā

ahl-e-mohabbat aao mil kar phir us ko ābād kareñ

jhūTe haiñ sab rishte naate koī kisī kā miit nahīñ

kis kis kā armān kareñ ham kis kis ko ham yaad kareñ

ujDa ujDa shahr-e-tamanna kaise ise aabaad karen

tum hi qatil tum hi aadil hum kis se fariyaad karen

amn-o-uKHuwwat apna maslak mehr-o-wafa hai apna din

apna to ye kaam nahin hai zulm-o-istibdad karen

KHush-fahmi ki patwaron se kashti khena kya mani

kuchh sochen kuchh rah nikalen waqt na yun barbaad karen

ahl-e-junun ne jis basti ko taraj-o-pamal kiya

ahl-e-mohabbat aao mil kar phir us ko aabaad karen

jhuTe hain sab rishte nate koi kisi ka mit nahin

kis kis ka arman karen hum kis kis ko hum yaad karen