عجلت میں وہ دیکھو کیا کیا چھوڑ گیا

عجلت میں وہ دیکھو کیا کیا چھوڑ گیا

اپنی باتیں اپنا چہرہ چھوڑ گیا

مجھ سے ایک کہانی سننے آیا تھا

اور مجھ میں وہ اپنا قصہ چھوڑ گیا

خواب زدہ تھا باتیں کرتا رہتا تھا

رونے والوں کو بھی ہنستا چھوڑ گیا

دل کے اک کونے میں آہیں رکھی ہیں

جانے والا اپنا حصہ چھوڑ گیا

جتنی یادیں لے کے ہم کو مرنا تھا

اتنی سانسیں دے کے زندہ چھوڑ گیا

دیواروں سے لگ کے رو لیتے ہوں گے

جن کو ان کا سایا تنہا چھوڑ گیا

کمرے سے جس دن اس کی تصویر ہٹی

آئینے نے دیکھ کے پوچھا چھوڑ گیا