ujlaton mein usne humse kah diya be-fikr hun

ujlatoñ meñ us ne ham se kah diyā be-fikr huuñ

par hamārī chaah meñ shām-o-sahar rote rahe

ashk merī ḳhairiyat lene kī ḳhātir dam-ba-dam

apnā sāhil chhoḌ kar ruḳhsār par bahte rahe

kyā abhī bhī ishq ke qābil nahīñ samjhe ga.e

jitne ġham tū ne diye hañs hañs ke ham sahte rahe

phuul tū bhī chhoḌ de ḳhushbū uḌānā baaġh meñ

ḳhaar tere vāste zaḳhmī mujhe karte rahe

be-hisī tujh se mujhe shikva hamesha se rahā

ġhair ke TukḌoñ pe kyuuñ ahl-e-qalam palte rahe

DhūñDh paatā hī nahīñ mujh ko magar us ke liye

ḳhush-nasībī thī zamīñ par naqsh-e-pā chhapte rahe

ai mohabbat imtihāñ lenā hamārā chhoḌ de

fail hote ham ga.e tujh ko burā kahte rahe

maañ agar ghar meñ rahe ghar bhī mirā jannat lage

phir sukūñ utnā milā jaise yahīñ rahte rahe

vāsta maiñ is hukūmat se bhalā kaise rakhūñ

ḳhud-kushī kar lī kisānoñ ne javāñ marte rahe

biij ham ne bo diyā banjar zamīñ dekhā nahīñ

phir hukūmat se gilā shikve sabhī karte rahe

qatl us ne kar diyā mujh ko magar achchhā huā

ḳhuun ke qatre usī ke haath se lipTe rahe

chāshnī urdu adab kī kam nahīñ hogī kabhī

ham buzurgoñ ke qalam ko thaam kar likhte rahe

ujlaton mein us ne hum se kah diya be-fikr hun

par hamari chah mein sham-o-sahar rote rahe

ashk meri KHairiyat lene ki KHatir dam-ba-dam

apna sahil chhoD kar ruKHsar par bahte rahe

kya abhi bhi ishq ke qabil nahin samjhe gae

jitne gham tu ne diye hans hans ke hum sahte rahe

phul tu bhi chhoD de KHushbu uDana bagh mein

KHar tere waste zaKHmi mujhe karte rahe

be-hisi tujh se mujhe shikwa hamesha se raha

ghair ke TukDon pe kyun ahl-e-qalam palte rahe

DhunDh pata hi nahin mujh ko magar us ke liye

KHush-nasibi thi zamin par naqsh-e-pa chhapte rahe

ai mohabbat imtihan lena hamara chhoD de

fail hote hum gae tujh ko bura kahte rahe

man agar ghar mein rahe ghar bhi mera jannat lage

phir sukun utna mila jaise yahin rahte rahe

wasta main is hukumat se bhala kaise rakhun

KHud-kushi kar li kisanon ne jawan marte rahe

bij hum ne bo diya banjar zamin dekha nahin

phir hukumat se gila shikwe sabhi karte rahe

qatl us ne kar diya mujh ko magar achchha hua

KHun ke qatre usi ke hath se lipTe rahe

chashni urdu adab ki kam nahin hogi kabhi

hum buzurgon ke qalam ko tham kar likhte rahe