ulfat ho to ulfat ke sahaare bhi bahut hain

ulfat ho to ulfat ke sahāre bhī bahut haiñ

āñkhoñ meñ mohabbat ke ishāre bhī bahut haiñ

himmat hai to māyūs na ho Dūbne vaale

tūfān haiñ maujoñ ke sahāre bhī bahut haiñ

ai jalva-e-rañgīñ ke ziyā dekhne vaalo

hoñ aañkh agar un ke nazāre bhī bahut haiñ

apnoñ ne to me.ār-e-vafā hī na batāyā

is raah meñ ehsān tumhāre bhī bahut haiñ

jī bhar ke zarā dekh to luuñ duur se gul-rañg

saaqī mujhe itne hī sahāre bhī bahut haiñ

us bazm kī rañgīniyāñ haiñ diid ke qābil

ik chāñd agar hai to sitāre bhī bahut haiñ

hai kaun 'safīr' aisā jo ban jaa.e sahārā

dil toḌne vaale to hamāre bhī bahut haiñ

ulfat ho to ulfat ke sahaare bhi bahut hain

aankhon mein mohabbat ke ishaare bhi bahut hain

himmat hai to mayus na ho Dubne wale

tufan hain maujon ke sahaare bhi bahut hain

ai jalwa-e-rangin ke ziya dekhne walo

hon aankh agar un ke nazare bhi bahut hain

apnon ne to mear-e-wafa hi na bataya

is rah mein ehsan tumhaare bhi bahut hain

ji bhar ke zara dekh to lun dur se gul-rang

saqi mujhe itne hi sahaare bhi bahut hain

us bazm ki ranginiyan hain did ke qabil

ek chand agar hai to sitare bhi bahut hain

hai kaun 'safir' aisa jo ban jae sahaara

dil toDne wale to hamare bhi bahut hain