ulfat ke fasane mazi ke kuchh bhule kuchh yaad aa bhi gae

ulfat ke fasāne maazī ke kuchh bhūle kuchh yaad aa bhī ga.e

ġham ke bādal dil pe mire kuchh chhaT bhī ga.e kuchh chhā bhī ga.e

jab ishq kī vaadī meñ ham tum le kar hāthoñ meñ haath chale

go ḳhaar bhī uljhe dāman meñ kuchh lamhe gul barsā bhī ga.e

jab rāz-e-mohabbat mujh se sunā kuchh vo bhī pasīje dam bhar ko

chup rahte hue kuchh kah bhī ga.e aur kahte hue katrā bhī ga.e

baazī meñ mohabbat kī aksar kuchh marhale aise aa.e haiñ

jab jiit ke bhī ham haar ga.e aur haar ke ham kuchh pā bhī ga.e

vo aa.e aur kuchh haal na pūchhā dil kā dard bhī kuchh na sunā

yuuñ dekh ki un ko dil ke kañval kuchh khil bhī ga.e murjhā bhī ga.e

uljhī sī haiñ ishq kī rāheñ jokhim sī kuchh ishq kī manzil

in rāhoñ meñ kuchh kho bhī ga.e aur manzil ko kuchh pā bhī ga.e

go laakh jatan ham ne bhī kiye par qalb kī taskīñ ho na sakī

armānoñ se dil ḳhālī na huā kuchh ghuT bhī ga.e kuchh pā bhī ga.e

kyā jaane ham kyā kah baiThe vo kah na sake jo kahnā thā

ham pyaar ke tāne-bāne ko suljhā bhī ga.e uljhā bhī ga.e

ye husn kī mastī un kī 'habīb' ye kyā hī anokhī mastī hai

kuchh ḳhud bhī hue be-ḳhud us se kuchh be-ḳhud ham ko banā bhī ga.e

ulfat ke fasane mazi ke kuchh bhule kuchh yaad aa bhi gae

gham ke baadal dil pe mere kuchh chhaT bhi gae kuchh chha bhi gae

jab ishq ki wadi mein hum tum le kar hathon mein hath chale

go KHar bhi uljhe daman mein kuchh lamhe gul barsa bhi gae

jab raaz-e-mohabbat mujh se suna kuchh wo bhi pasije dam bhar ko

chup rahte hue kuchh kah bhi gae aur kahte hue katra bhi gae

bazi mein mohabbat ki aksar kuchh marhale aise aae hain

jab jit ke bhi hum haar gae aur haar ke hum kuchh pa bhi gae

wo aae aur kuchh haal na puchha dil ka dard bhi kuchh na suna

yun dekh ki un ko dil ke kanwal kuchh khil bhi gae murjha bhi gae

uljhi si hain ishq ki rahen jokhim si kuchh ishq ki manzil

in rahon mein kuchh kho bhi gae aur manzil ko kuchh pa bhi gae

go lakh jatan hum ne bhi kiye par qalb ki taskin ho na saki

armanon se dil KHali na hua kuchh ghuT bhi gae kuchh pa bhi gae

kya jaane hum kya kah baiThe wo kah na sake jo kahna tha

hum pyar ke tane-bane ko suljha bhi gae uljha bhi gae

ye husn ki masti un ki 'habib' ye kya hi anokhi masti hai

kuchh KHud bhi hue be-KHud us se kuchh be-KHud hum ko bana bhi gae