الفت کی جو کتاب تھے وہ لوگ مر گئے

الفت کی جو کتاب تھے وہ لوگ مر گئے

مہر و وفا کا باب تھے وہ لوگ مر گئے

جن پر تمام تھی مری بے نام سی حیات

چاہت کا جو حساب تھے وہ لوگ مر گئے

لاکھوں سوال اب مری مٹھی میں قید ہیں

ان سب کے جو جواب تھے وہ لوگ مر گئے

اب تو ہوا میں ایسی گھٹن ہے کہ یار بس

خوشبو تھے جو گلاب تھے وہ لوگ مر گئے

جن کی چمک سے زندگی میں روشنی ہوئی

سورج تھے ماہتاب تھے وہ لوگ مر گئے

وہ جن کا لفظ لفظ بھی آنکھوں کا رزق تھا

سلجھی ہوئی کتاب تھے وہ لوگ مر گئے

دل کی خوشی بھی ان کے توسط سے تھی مری

دل کا جو اضطراب تھے وہ لوگ مر گئے