الفت میں ایسی لغزش مستانہ چاہیے

الفت میں ایسی لغزش مستانہ چاہیے

در پر ترے گریں تو سنبھلنا نہ چاہیے

ہے عالم شباب کسی کا نگاہ میں

میری نظر کو اور تماشا نہ چاہیے

ساقی کی اک نگاہ پہ مدہوش بزم ہے

گردش میں اب تو ساغر و مینا نہ چاہیے

چلمن کی تیلیوں سے رکی کب نگاہ شوق

اس پر کبھی بھی بندش بے جا نہ چاہیے

ساقی گری کی لاج رکھو یہ تو اہتمام

کوئی بھی رند بزم میں پیاسا نہ چاہیے

فرزانگی سے طے ہوئی کب منزل حیات

رخت سفر میں اک دل دیوانہ چاہیے

ہر ہر قدم پہ سوچ کے چلنا عجیب ہے

جینے کو کچھ تو جرأت رندانہ چاہیے

کم ہے حبیبؔ عمر تأسف کے واسطے

دنیاں کو بات بات پہ جھٹلانا چاہیے