ulfat na karunga ab kisi ki

ulfat na karūñgā ab kisī kī

dushman huā jis se dostī kī

hālat kahūñ apnī be-ḳhudī kī

dil de ke suno jo mere jī kī

avval avval bhalā.iyāñ kiiñ

āḳhir āḳhir bahut burī kī

masrūf hai sīna-kūbī meñ dil

aatī hai sadā dhaḌā-dhaḌī kī

ulfat pe terī ḳhātma hai

ab le le qasam tū āshiqī kī

karte rahe iḳhtirā.a aaphī

taqlīd na kī kabhī kisī kī

rone pe mere hañste haiñ aap

hañs lījiye baat hai hañsī kī

kyūñkar na farefta ho insāñ

tan huur kā shakl hai parī kī

shīrīñ-dahno nahīñ hai zebā

tum bāteñ karo na phīkī phīkī

dīvāna huā huuñ ik parī kā

taqsīr ye hai to vāqa.ī kī

be-yār hai dil kabāb-e-sāqī

taklīf na kar tū mai-kashī kī

āñkheñ laḌīñ tujh se maiñ huā qatl

in turkoñ ne jañg-e-zargarī kī

karne do badī jo karte haiñ ġhair

suntā nahīñ 'rind' vo kisī kī

ulfat na karunga ab kisi ki

dushman hua jis se dosti ki

haalat kahun apni be-KHudi ki

dil de ke suno jo mere ji ki

awwal awwal bhalaiyan kin

aaKHir aaKHir bahut buri ki

masruf hai sina-kubi mein dil

aati hai sada dhaDa-dhaDi ki

ulfat pe teri KHatma hai

ab le le qasam tu aashiqi ki

karte rahe iKHtiraa aaphi

taqlid na ki kabhi kisi ki

rone pe mere hanste hain aap

hans lijiye baat hai hansi ki

kyunkar na farefta ho insan

tan hur ka shakl hai pari ki

shirin-dahno nahin hai zeba

tum baaten karo na phiki phiki

diwana hua hun ek pari ka

taqsir ye hai to waqai ki

be-yar hai dil kabab-e-saqi

taklif na kar tu mai-kashi ki

aankhen laDin tujh se main hua qatl

in turkon ne jang-e-zargari ki

karne do badi jo karte hain ghair

sunta nahin 'rind' wo kisi ki