uljhanon ka sira nahin milta

uljhanoñ kā sirā nahīñ miltā

kyā kareñ mudda.ā nahīñ miltā

ishtihāroñ ne gher lī dīvār

mere ghar kā patā nahīñ miltā

ruuTh jaate haiñ lafz ma.anī se

āsmāñ par ḳhudā nahīñ miltā

har nayā pal hai ik nayā ehsās

har kisī ko maza nahīñ miltā

ab to qānūn kī chale hai miyāñ

ab bhale ko bhalā nahīñ miltā

hādsoñ kī kise shikāyat hai

hādsoñ kā sila nahīñ miltā

phuul kāñTe haiñ dhūp-chhāñv hai

peḌ paudoñ meñ kyā nahīñ miltā

talḳhiyoñ meñ miThās chakhtā huuñ

dard-e-dil ke sivā nahīñ miltā

āñktā huuñ yaqīñ kī gahrā.ī

jāntā huuñ ḳhudā nahīñ miltā

be-sabab hādse nahīñ hote

ranj bhī be-vajah nahīñ miltā

har kisī se vafā nahīñ miltī

har koī bevafā nahīñ miltā

tum ḳhudā kī talāsh karte ho

aadmī kā pata nahīñ miltā

tere maazī ke in sahīfoñ meñ

haal kā jā.eza nahīñ miltā

uljhanon ka sira nahin milta

kya karen muddaa nahin milta

ishtihaaron ne gher li diwar

mere ghar ka pata nahin milta

ruTh jate hain lafz mani se

aasman par KHuda nahin milta

har naya pal hai ek naya ehsas

har kisi ko maza nahin milta

ab to qanun ki chale hai miyan

ab bhale ko bhala nahin milta

hadson ki kise shikayat hai

hadson ka sila nahin milta

phul kanTe hain dhup-chhanw hai

peD paudon mein kya nahin milta

talKHiyon mein miThas chakhta hun

dard-e-dil ke siwa nahin milta

aankta hun yaqin ki gahrai

jaanta hun KHuda nahin milta

be-sabab hadse nahin hote

ranj bhi be-wajah nahin milta

har kisi se wafa nahin milti

har koi bewafa nahin milta

tum KHuda ki talash karte ho

aadmi ka pata nahin milta

tere mazi ke in sahifon mein

haal ka jaeza nahin milta