uljhe to sab nasheb-o-faraaz-e-hayat mein

uljhe to sab nasheb-o-farāz-e-hayāt meñ

ham the ki un kī zulfoñ ke ḳham dekhte rahe

jab ghar jalā thā merā vo manzar ajiib thā

dekhā nahīñ jo tum ne vo ham dekhte rahe

vo sāhib-e-qalam na vo ab sāhibān-e-saif

kyā ho ga.e haiñ saif o qalam dekhte rahe

ham tishna-kām jām-e-tahī le ke haath meñ

saaqī kā mai-kade meñ bharam dekhte rahe

pahuñche sanam-kade meñ to hairat na kam huī

kitne badal ga.e haiñ sanam dekhte rahe

bas dekhte hī dekhte 'naushād' kyā kaheñ

sūraj ġhurūb ho gayā ham dekhte rahe

uljhe to sab nasheb-o-faraaz-e-hayat mein

hum the ki un ki zulfon ke KHam dekhte rahe

jab ghar jala tha mera wo manzar ajib tha

dekha nahin jo tum ne wo hum dekhte rahe

wo sahib-e-qalam na wo ab sahiban-e-saif

kya ho gae hain saif o qalam dekhte rahe

hum tishna-kaam jam-e-tahi le ke hath mein

saqi ka mai-kade mein bharam dekhte rahe

pahunche sanam-kade mein to hairat na kam hui

kitne badal gae hain sanam dekhte rahe

bas dekhte hi dekhte 'naushad' kya kahen

suraj ghurub ho gaya hum dekhte rahe