uljhe uljhe dhage dhage se KHayalon ki tarah

uljhe uljhe dhāge dhāge se ḳhayāloñ kī tarah

ho gayā huuñ in dinoñ tere savāloñ kī tarah

apne dil kī vus.atoñ meñ har taraf bhaTkā phirā

be-karāñ mub.ham sarāboñ meñ ġhazāloñ kī tarah

ye mirā ehsās hai yā jabr-e-mausam kā asar

ab kī rut mahke nahīñ gul pichhle sāloñ kī tarah

asr-e-hāzir kī jabīñ par talḳhiyāñ kanda huiiñ

tan ga.e hālāt apne gird jāloñ kī tarah

dasht-e-ġham meñ āñdhiyoñ ke daar sahne ke liye

ḳhushk patte uTh rahe haiñ aaj Dhāloñ kī tarah

zulmat-e-maġhrib ko 'ḳhātir' koī ye paiġhām de

ham bhī ab ubhreñge mashriq se ujāloñ kī tarah

uljhe uljhe dhage dhage se KHayalon ki tarah

ho gaya hun in dinon tere sawalon ki tarah

apne dil ki wusaton mein har taraf bhaTka phira

be-karan mubham sarabon mein ghazalon ki tarah

ye mera ehsas hai ya jabr-e-mausam ka asar

ab ki rut mahke nahin gul pichhle salon ki tarah

asr-e-hazir ki jabin par talKHiyan kanda huin

tan gae haalat apne gird jalon ki tarah

dasht-e-gham mein aandhiyon ke dar sahne ke liye

KHushk patte uTh rahe hain aaj Dhaalon ki tarah

zulmat-e-maghrib ko 'KHatir' koi ye paigham de

hum bhi ab ubhrenge mashriq se ujalon ki tarah