ulTa asar ye shikwa-e-bedad se hua

ulTā asar ye shikva-e-bedād se huā

vo aur bhī ḳhafā mirī fariyād se huā

majnūñ hī se huā na vo 'farhād' se huā

jo kaam ishq meñ dil-e-nāshād se huā

dushman kī kyā majāl ki mujh ko burā kahe

jo kuchh huā huzūr ke irshād se huā

us dushman-e-vafā kā tasavvur hai phir mudām

majbūr maiñ to is dil-e-nāshād se huā

allāh hī ab ke jaan bachā.e to bach sake

phir ishq mujh ko ik sitam-ījād se huā

marne ke baad bhī na ga.ī ishq kī ḳhalish

ye uqda hal na ḳhanjar-e-jallād se huā

itnā to be-qarār huā thā na dil kabhī

jitnā ki muztar aaj tirī yaad se huā

jo kaam dostoñ se na ulfat meñ ho sakā

'hājir' vo kaam ġhair kī imdād se huā

ulTa asar ye shikwa-e-bedad se hua

wo aur bhi KHafa meri fariyaad se hua

majnun hi se hua na wo 'farhad' se hua

jo kaam ishq mein dil-e-nashad se hua

dushman ki kya majal ki mujh ko bura kahe

jo kuchh hua huzur ke irshad se hua

us dushman-e-wafa ka tasawwur hai phir mudam

majbur main to is dil-e-nashad se hua

allah hi ab ke jaan bachae to bach sake

phir ishq mujh ko ek sitam-ijad se hua

marne ke baad bhi na gai ishq ki KHalish

ye uqda hal na KHanjar-e-jallad se hua

itna to be-qarar hua tha na dil kabhi

jitna ki muztar aaj teri yaad se hua

jo kaam doston se na ulfat mein ho saka

'hajir' wo kaam ghair ki imdad se hua